Rev 16 | AAK | STEP | Nionɨ arí̵á wíáyí̵ aŋí̵ ŋwí̵áiwámɨ dánɨ maŋí̵ bá eŋí̵ tí̵nɨ aŋí̵nají̵ we' wí̵u'mɨ dáŋí̵ wau' awamɨ re urɨne'napí̵agɨ arí̵á wiŋanigɨnɨ, “Soyí̵ne' nuro Gorɨxoyá wikí̵ ónɨŋí̵ pɨrerɨxí̵ we' wí̵u'mɨ dáŋí̵ wau' ayo magwí̵ eŋí̵pɨ xwí̵árímɨ mɨwiárómoaípoyɨ.” urɨne'napí̵agɨ arí̵á wiŋanigɨnɨ.

Revelation of John 16

Aŋí̵nají̵ we' wí̵u'mɨ dáŋí̵ wau' pɨrerɨxí̵yo ínɨŋí̵pɨ mɨwiárómogí̵á nánɨrɨnɨ.

1 Nionɨ arí̵á wíáyí̵ aŋí̵ ŋwí̵áiwámɨ dánɨ maŋí̵ bá eŋí̵ tí̵nɨ aŋí̵nají̵ we' wí̵u'mɨ dáŋí̵ wau' awamɨ re urɨne'napí̵agɨ arí̵á wiŋanigɨnɨ, “Soyí̵ne' nuro Gorɨxoyá wikí̵ ónɨŋí̵ pɨrerɨxí̵ we' wí̵u'mɨ dáŋí̵ wau' ayo magwí̵ eŋí̵pɨ xwí̵árímɨ mɨwiárómoaípoyɨ.” urɨne'napí̵agɨ arí̵á wiŋanigɨnɨ.

2 Aŋí̵nají̵ awa wo pɨrerɨxí̵ o xɨrɨŋí̵na nɨmeáa nurɨ xwí̵árímɨ mɨwiárómoaíáná re eŋɨnigɨnɨ. Ámá naŋwoyápɨ ipɨrí̵á eánɨro xegí̵ xopaikɨgí̵ imɨxɨnɨŋí̵pimɨ seáyɨ e umero yarɨgí̵áyí̵ oremá sɨpí xwɨrí̵á wianarɨgí̵ápɨ imónɨgí̵awixɨnɨ.

3 Aŋí̵nají̵ awa ámɨ wo xegí̵ pɨrerɨxí̵na rawɨrawáyo mɨwiárómoaíáná re eŋɨnigɨnɨ. Rawɨrawá ragí̵ nimónɨrɨ ámá pɨyí̵yá pwarɨŋí̵pa axí̵pɨ pí̵pí̵ó oŋí̵ imónárɨŋɨnigɨnɨ. E imónáráná amɨpí dɨŋí̵ tí̵ŋí̵ rawɨrawáyo ŋweaŋí̵yí̵ ní̵nɨ pɨyí̵ yárɨŋɨnigɨnɨ.

4 Aŋí̵nají̵ awa ámɨ wo xegí̵ pɨrerɨxí̵na iniɨgí̵ ná wearɨŋí̵yo tí̵nɨ sɨmɨŋí̵ meaarɨŋí̵yo tí̵nɨ mɨwiárómoaíáná iniɨgí̵ ní̵nɨ ragí̵ imónɨŋɨnigɨnɨ. 5 Iniɨgí̵ ní̵nɨ ragí̵ imónáná aŋí̵nají̵ iniɨgí̵ xiáwo re rarɨŋagɨ arí̵á wiŋanigɨnɨ, “Agwɨ ríná ŋwearɨ eŋíná dánɨ anɨŋí̵ imónɨrɨ eŋoxɨnɨ, aga sɨyikwí̵ míní̵ eŋoxɨnɨ, pɨrí̵ joxɨ umamoarɨŋí̵ apɨ xwɨyí̵á mɨmeárɨnɨpa nerɨ xɨxenɨ wikárarɨŋɨnɨ. 6 Ayí̵ ámá dɨxí̵ imónɨgí̵áyo tí̵nɨ wí̵á rókiamogí̵áyo tí̵nɨ ragí̵ pɨkieweámɨxɨgí̵á nánɨ joxɨ ragí̵ oní̵poyɨnɨrɨ pɨrí̵ apɨ numamorí̵ná xɨxenɨ yarɨŋɨnɨ. Ámá ayí̵ pɨrí̵ joxɨ umamoarɨŋí̵pɨ rí̵nɨŋí̵ meapaxí̵ imónɨgí̵áyí̵ eŋagí̵a nánɨ ayí̵ ananɨrɨnɨ.” rarɨŋagɨ arí̵á nɨwirɨ 7 xwɨyí̵á bɨ íráí̵ noa peyinɨŋe dánɨ re rɨnarɨŋagɨ arí̵á wiŋanigɨnɨ, “Ámɨná Gorɨxoxɨnɨ, eŋí̵ eánɨŋí̵ tí̵gí̵áyo nɨyonɨ seáyɨ e wimónɨŋoxɨnɨ, ayí̵ neparɨnɨ. O aga xɨxenɨ rɨŋoɨ. Pɨrí̵ joxɨ umamoarɨŋí̵ apɨ apɨ nepa xɨxenɨnɨ wiarɨŋí̵rɨnɨ.” rarɨŋagɨ arí̵á wiŋanigɨnɨ.

8 Aŋí̵nají̵ awa ámɨ wo xegí̵ pɨrerɨxí̵na sogwomɨ mɨwiárómóáná Gorɨxo ámá xwí̵áyo ŋweagí̵áyo xe sogwí̵ xaíwí̵ nɨwepí̵nɨrɨ nanɨrɨ rí̵mɨmenɨŋwí̵ neánɨrɨ pɨrí̵ owiárɨnɨrɨ sɨŋwí̵ wɨnɨŋɨnigɨnɨ. 9 Xe rí̵mɨmenɨŋwí̵ neánɨrɨ pɨrí̵ owiárɨnɨrɨ sɨŋwí̵ wɨní̵agɨ sogwí̵ nɨwepí̵nɨrɨ ayo rí̵á pɨrí̵ wiárí̵agɨ nánɨ ámá ayí̵ Gorɨxomɨ —O xegí̵ eŋí̵ sɨxí̵ eánɨŋí̵yo dánɨ xeanɨŋí̵ ayí̵ wikárɨpaxí̵ imónɨŋorɨnɨ. Omɨ ikayí̵wí̵ numearɨróná wigí̵ í̵wí̵ yarɨgí̵ápɨ rí̵wí̵mɨnɨ nɨmamoro omɨ seáyɨ e mumí̵eyoagí̵awixɨnɨ.

10 Aŋí̵nají̵ awa ámɨ wo xegí̵ pɨrerɨxí̵na íkwiaŋwí̵ naŋwo e'í̵ nɨŋweámáná ámáyo umeŋweaŋí̵namɨ mɨwiárómoaíáná re eŋɨnigɨnɨ. Ámá naŋwo xegí̵ seáyɨ e nɨwimónɨrɨ umeŋweaŋí̵yo nɨyonɨ sí̵á yidoárɨŋɨnigɨnɨ. Sí̵á yidoáráná rí̵nɨŋí̵ ayɨkwí̵ wí mɨwinarɨŋagɨ nánɨ iwieánɨro wigí̵ aíwí̵ sí̵wí̵ kiro neróná 11 wigí̵ sɨpí yarɨgí̵ápɨ rí̵wí̵mɨnɨ mɨmamopa nero rí̵nɨŋí̵ winarɨŋí̵pɨ tí̵nɨ uraní̵ egí̵ápɨ tí̵nɨ nánɨ Ŋwí̵á aŋí̵namɨ dáŋomɨ ikayí̵wí̵ umearɨgí̵awixɨnɨ.

12 Aŋí̵nají̵ awa yoparo tí̵ŋo xegí̵ pɨrerɨxí̵na iniɨgí̵ rapá xwe'u', Yupɨretisɨyɨ rɨnɨŋu'mɨ mɨwiárómoaíáná mɨxí̵ ináyí̵ sogwí̵ í̵wiaparɨŋí̵mɨ dáŋowa iniɨgu'mɨ ananɨ xepí̵rɨ nánɨ yeáyí̵ yárɨŋɨnigɨnɨ. 13 Nionɨ wenɨŋí̵ e'áyí̵ wɨnɨŋanigɨnɨ. Pɨyɨmɨní̵á sɨpí biau' bɨ mɨnɨŋí̵nɨŋí̵ nimónɨro iwí̵ xwe'oyá maŋí̵yo dánɨ í̵wiapɨrɨ naŋwoyá maŋí̵yo dánɨ í̵wiapɨrɨ mimóní̵ wí̵á rókiamoarɨŋoyá maŋí̵yo dánɨ í̵wiapɨrɨ yarɨŋagí̵a wɨnɨŋanigɨnɨ. 14 Pɨyɨmɨní̵á apiau' apɨ nɨpɨnɨ kwíyí̵ sɨpípɨrɨnɨ. Ámáyo emɨmí̵ nɨwíwapɨya warɨgí̵ápɨrɨnɨ. Mɨxí̵ ináyí̵ xwí̵á nɨrímɨnɨ ŋweagí̵áyí̵ sí̵á sɨpí Gorɨxo, eŋí̵ eánɨgí̵á nɨyonɨ seáyɨ e wimónɨŋoyáyimɨ mɨxí̵ inɨpí̵rí̵a nánɨ awí oeaemeaneyɨnɨrɨ upí̵rí̵ápɨrɨnɨ. 15 Ai, Ámɨnáonɨ ámá árí̵wɨyimɨ í̵wí̵ meámɨnɨrɨ barɨgí̵ápánɨŋí̵ axí̵pɨ bɨmí̵árɨnɨ. Ámá sánɨŋí̵ mɨwe' sɨŋwí̵ nanɨro aikí̵ píránɨŋí̵ nɨyínɨro ŋweagí̵áyí̵ yayí̵ owinɨnɨ. E mepa nerí̵náyí̵, íkwauyɨxí̵yí̵ nuróná ámá sɨŋwí̵yo dánɨ ayá winɨnɨgɨnɨrɨ nánɨrɨnɨ. 16 Kwíyí̵ sɨpí biau' bɨ apɨ nuro mɨxí̵ ináyowamɨ nɨwirɨmearo Xibɨruyí̵ pí̵ne' tí̵nɨ Amagedonɨyɨ rɨnɨŋe awí eaárarɨŋagí̵a wɨnɨŋanigɨnɨ.

17 Aŋí̵nají̵ awa yoparo xegí̵ pɨrerɨxí̵na imɨŋí̵ yarɨŋe —E kwíyí̵ sɨpíyí̵yá aŋí̵ erɨnɨ. E mɨwiárómoaíáná aŋí̵ ŋwí̵áiwámɨ ínɨmɨ siá íkwiaŋwí̵namɨ dánɨ xwɨyí̵á eŋí̵ tí̵nɨ rí̵aiwá re rɨne'napɨŋɨnigɨnɨ, “Rɨxa apɨrɨnɨ.” rɨne'napáná re eŋɨnigɨnɨ. 18 Ápiaŋwí̵ nókímɨxa urɨ aŋí̵namɨ dánɨ ikaxí̵ nɨra urɨ akɨrɨwí̵ nɨra urɨ nerɨ poboní̵ xwe' bɨ —Apɨ eŋíná ámá xwí̵árímɨ iwamí̵ó ŋweaagí̵e dánɨ waíní̵ waíná poboní̵ xwe' nerɨ aiwɨ bɨ apɨ tí̵nɨ xɨxenɨ mɨyagí̵ eŋagɨ nánɨ apɨ aga xwe' bɨrɨnɨ. 19 Apɨ yarí̵ná aŋí̵ aga xwe' mamadí̵ ikwí̵rónɨŋí̵pɨ xwí̵á yaiwiámí̵ nɨmenɨrí̵ná nɨkwɨrɨnɨrɨ biau' bɨ imónɨrɨ aŋí̵ ámá gwí̵ wɨrí̵ wɨrí nɨyí̵yáyí̵ u'pɨyinowirɨ eŋɨnigɨnɨ. E nerí̵ná Gorɨxo aŋí̵ xwe' Babironɨyɨ rɨnɨŋí̵pɨ nánɨ dɨŋí̵ peá mɨmó nerɨ ámá apimɨ ŋweagí̵á rí̵nɨŋí̵ xwe' omeápoyɨnɨrɨ kapɨxí̵ xí̵oyá wikí̵ ónɨŋí̵pimɨ dánɨ mɨxí̵pɨ ínɨŋí̵wá mɨnɨ wíagɨ 20 pɨrɨŋwí̵ ní̵nɨ rawɨrawáyo urí̵pínɨrɨ dí̵wí̵ mɨŋí̵ roŋí̵yí̵ ní̵nɨ aínɨrɨ nerɨ 21 aŋí̵naíkí̵ xwe' amɨmá inɨŋí̵ wí —Wonɨ wonɨ xegí̵ saŋí̵ 50 kiro imónɨŋí̵pɨrɨnɨ. Apɨ aŋí̵namɨ dánɨ ámáyo pie'róáná xeanɨŋí̵ Gorɨxo wikárí̵í̵ apɨ xeanɨŋí̵ aga rí̵á tí̵ŋí̵ eŋagɨ nánɨ omɨ ikayí̵wí̵ umeararɨŋagí̵a wɨnɨŋanigɨnɨ.